आंबेडकरी ऐक्य मिशनला यश — बसपा व रिपब्लिकन आघाडी नगर परिषद निवडणूक एकत्र लढविणार
भद्रावती, दि. ८ नोव्हेंबर :
भद्रावती नगर परिषद निवडणूक 2025 पार्श्वभूमीवर आंबेडकरी समाजाच्या ऐक्याचा नारा देत सामाजिक संघटना भीम आर्मी आणि समता सैनिक दल यांच्या संयुक्त विद्यमाने सुरू करण्यात आलेल्या “आंबेडकरी ऐक्य मिशन अभियानाला” आज मोठे यश मिळाले आहे.
या अभियानाच्या प्रयत्नातून बहुजन समाज पार्टी (बसपा) आणि संयुक्त रिपब्लिकन आघाडी यांनी एकत्र येऊन नगर परिषद निवडणूक लढविण्याचा ऐतिहासिक निर्णय घेतला आहे. आंबेडकरी समाजात दीर्घकाळापासून अपेक्षित असलेले राजकीय ऐक्य आता वास्तवात उतरत असल्याची भावना कार्यकर्त्यांमध्ये व्यक्त केली जात आहे.
आज भद्रावती येथे झालेल्या विशेष बैठकीत हा निर्णय अधिकृतरित्या घेण्यात आला. या बैठकीस विविध आंबेडकरी संघटनांचे प्रमुख नेते आणि पदाधिकारी मोठ्या संख्येने उपस्थित होते.
बैठकीस प्रमुख उपस्थिती :
रिपब्लिकन आघाडीचे संयोजक मा. मारोतराव रामटेके, सामाजिक कार्यकर्ते अॅड. भूपेंद्र रायपूरे, रिपाई नागपूर प्रदेश सरचिटणीस सिद्धार्थ सुमन, पिरिपा जिल्हाध्यक्ष हरिशभाई दुर्योधन, भीम आर्मी विदर्भ निरीक्षक शंकर मून, बसपा जिल्हा प्रभारी मिलिंद शेंडे, सामाजिक कार्यकर्ते अजय लिहीतकर, रवी वानखेडे, रिपाई (आठवले) चे प्रतिनिधी शरद नगराळे, रिपाई तालुका अध्यक्ष संतोषभाई रामटेके, उमेश रामटेके आदी मान्यवर तसेच मोठ्या संख्येने कार्यकर्ते उपस्थित होते.
बैठकीदरम्यान वक्त्यांनी म्हटले की —
“भद्रावती नगर परिषदेत खऱ्या अर्थाने परिवर्तन घडवायचे असेल, तर आंबेडकरी समाजाने वैचारिक आणि राजकीय स्तरावर एकत्र यावे. विभाजन आणि वैमनस्यामुळे आपले राजकीय नुकसान झाले आहे. आता एकच झेंडा — एकच उमेदवार — एकच लढा या धोरणाने निवडणुकीला सामोरे जायचे आहे.”
अभियानाचे प्रमुख सूत्रसंचालन करताना भीम आर्मी व समता सैनिक दलाच्या पदाधिकाऱ्यांनी स्पष्ट केले की हे ऐक्य नाॅन-पॉलिटिकल दबाव गटाच्या रूपात सुरू झाले असले तरी आता ते राजकीय परिवर्तनाच्या मिशनमध्ये परिवर्तित झाले आहे.
बैठकीच्या शेवटी सर्व आंबेडकरी संघटनांनी “जय भीम – जय संविधान” चा घोष करीत एकत्रित लढ्याचा निर्धार व्यक्त केला.
0 Comments