#Bhadravti• भद्रावती नगर परिषद निवडणुकीत आंबेडकरी ऐक्याला धक्का• भिम आर्मी आणि समता सैनिक दलाच्या प्रयत्नांना राजकीय लोकांनी पाठ फिरवली• आंबेडकरी पक्ष स्वतंत्रपणे निवडणुकीत उतरणार — बि.एस.पी./वंचितची भूमिका संशयास्पद

#Bhadravti

• भद्रावती नगर परिषद निवडणुकीत आंबेडकरी ऐक्याला धक्का

• भिम आर्मी आणि समता सैनिक दलाच्या प्रयत्नांना राजकीय लोकांनी पाठ फिरवली

• आंबेडकरी पक्ष स्वतंत्रपणे निवडणुकीत उतरणार — बि.एस.पी./वंचितची भूमिका संशयास्पद

हिंदूस्थान न्यूज 24 : मनोज मोडक 

विशेष जिल्हा प्रतिनीधी, चंद्रपूर 

भद्रावती :  भद्रावती नगर परिषद निवडणुकीच्या पार्श्वभूमीवर आंबेडकरी ऐक्याचे प्रयत्न भिम आर्मी आणि समता सैनिक दलाच्या वतीने सुरू करण्यात आले होते. मात्र, हे प्रयत्न फसल्याचं स्पष्ट होत असून स्थानिक राजकीय नेत्यांनी या ऐक्याला पाठ फिरवल्याने असंतोष व्यक्त केला जात आहे.

मिळालेल्या माहितीनुसार, भिम आर्मी आणि समता सैनिक दलाने सर्व आंबेडकरी विचारधारेच्या संघटना, कार्यकर्ते आणि पक्षांना एकत्र आणून “एकदिलाने निवडणूक लढवू” असा प्रस्ताव मांडला होता. पण काही तथाकथित राजकीय नेत्यांनी वैयक्तिक स्वार्थ, पदलालसा आणि सत्तेच्या समीकरणात अडकून या प्रयत्नांना सहकार्य करण्यास नकार दिला.

यामुळे आंबेडकरी मतदारांमध्ये नाराजीचे वातावरण निर्माण झाले असून, “एकतेच्या नावाने मतांची विभागणी करून फायदाच इतरांना मिळतो” अशी टीका कार्यकर्त्यांमध्ये होत आहे.

दरम्यान, भद्रावतीतील आंबेडकरी पक्षांनी स्वतंत्रपणे निवडणुकीच्या रिंगणात उतरायचा निर्णय घेतला आहे. काही युवा नेत्यांनी “विचारांचा झेंडा आम्ही स्वतंत्रपणे फडकवू” अशी ठाम भूमिका घेतली आहे.

दरम्यान, बौद्ध समाजातील मतदारसंघात प्रभाव असलेल्या बि.एस.पी. आणि वंचित बहुजन आघाडी यांच्या भूमिकेबाबत संभ्रम कायम आहे. दोन्ही पक्षांकडून अद्याप स्पष्ट भूमिका जाहीर झालेली नाही, त्यामुळे त्यांचा पवित्रा “संशयास्पद” असल्याची चर्चा शहरात सुरू आहे.

भद्रावतीतील आगामी निवडणुकीत या ऐक्याच्या अभावाचा थेट परिणाम कोणाच्या मतांवर होईल आणि कोणाला फायदा मिळेल, हे येत्या काही दिवसांत स्पष्ट होणार आहे.